Fablab

Vinurinn hangir ekki í tölvunni allan daginn, nei hann fer í FabLab og sker út ostabakka og nokkur hálsmen fyrir mömmu sína! Bara af því hann langar til þess <3

Published with Blogger-droid v2.0.10

Þorri er mættur á E9

Hákarl á pizzuna... það fer ekki á milli mála að Þorri er mættur á E9.

Published with Blogger-droid v2.0.10

Fjögurra daga helgi

En yndisleg og dásamleg helgi! Það er ekkert annað :)

Mér finnst helgarnar verða svo svakalega drjúgar ef maður kemur sér í gírinn strax á fimmtudegi og á fimmtudaginn fórum við Tóti einmitt á frábæra tónleika með SoundPost á Café Haiti. Alveg yndislegt að hitta Halla og Hörpu og sjá og heyra þau koma fram. Föstudagurinn var ljúfur, ég gerði kjúklingasúpu í kvöldmatinn og þurfti ekki að elda meira það sem eftir lifði helgar því síðasti dreitillinn rann ljúflega niður í kvöld, sunnudagskvöld :) Laugardagurinn var rólegur framan af, smá þrif, hamstrabúrin tekin í gegn og unglingapartý undirbúið, prinsinn er að verða 12 ára í næstu viku. 12 ÁRA, ég meina það! Ég hef nú aldrei vitað annað eins rólegheita-partý, það þurfti ekki einu sinni að sópa þegar þessar elskur voru farnar og ég lét þau vita að þeim væri meira en velkomið að halda öll sín unglingapartý á E9.

Svo kom sunnudagurinn. Fjórði dagur þessarar helgar (út af þessu með fimmtudaginn manstu?) og framan af leit nú út fyrir að ég ætlaði ekki úr náttfötunum. Sem betur fer dreif ég mig úr þeim seinnipartinn og skellti mér upp á Háahnúk með Neró og þar horfðum við saman á sólsetrið. Svakalega flott veður, snjór yfir öllu, él á köflum en annars bjart. Alveg yndislegt og gaf alveg tóninn fyrir næstu viku sem verður væntanlega ein sú mest spennandi um langa hríð. Kannski verður meira sagt frá því síðar, en auðvitað á maður ekki að drífa sig svo eða hugsa svo mikið um það sem framundan er að maður gleymi að njóta því sem er akkúrat núna. Þess vegna tók ég myndir í dag! Svo ég geti notið aðeins lengur :)

Vor í lofti?

Ég tók göngu/skokkhring um Akranes áðan og held svei mér þá að það sé vor í lofti! Klakinn að bráðna af gangstéttum í þíðunni og milt og hlýtt kvöldveður. Er þetta óvinsælasta færsla dagsins? Veit ekki, að minnsta kosti er ekki víst að samlandar mínir í öðrum landshlutum taki undir þessa hugmynd mína.

Frá snjóhreinsun á Ísafirði 2. janúar 2013

Frá kvöldskokkinu á Akranesi 2. janúar 2013

Það er gott að búa á Akranesi, veðurlega séð :)

Áramót

Þá er árið 2012 loksins búið og undirrituð á ekki eftir að sakna þess. Ég tek áramót ávallt alvarlega og sérstaklega núna þegar liðið ár hefur verið erfitt og slítandi. T.d.set ég alltaf áramótaheiti og áramótaheitið mitt núna tengist nýju upphafi, að segja skilið við þar sem liðið er og hætta að velta mér upp úr erfiðleikunum. Ég ætla að horfa fram á við og vera bjartsýn. Hananú, þetta verður ekki mikið mál ha? Alla vega verður ekki mikið mál að gera árið 2013 betra en árið 2012, það er þó stór plús :)

Jól og áramót hafa farið vel með liðið á E9. Við erum búin liggja í leti, borða og svo höfum við spilað mikið. Sólin er orðin snillingur í Íslandopoly og við getum tekið 3ja tíma spil þar sem hún er í banastuði allan tímann og vinnur svo auðvitað að lokum (hún er klók nefnilega!). Vinurinn hefur beðið spenntur eftir sprengjunum því áramót eru jú uppáhaldshátíðin hans (afmælið hans er í öðru sæti og jólin í því þriðja). Hann var því í aðalhlutverki í gærkvöldi ásamt afa sínum, þeir sprengdu sem óðir væru litlu drengirnir. Við fórum líka á áramótabrennu í Kalmansvík, en það var mjög hvasst og kalt svo þar var ekkert sprengt. Skaupið var fínt, dáldið meinfýsið en við hlógum oft og ég er bara alveg sátt við það. Ætla að hleypa nokkrum myndum hér að, er orðin hrifin af því að nota bloggið sem dagbók í máli og myndum, það er gaman að fletta hér í gegn og rifja upp og stundum óska ég að ég hefði sett inn fleiri myndir!

Á skautum milli jóla og nýárs 2012. Þess ber að geta að við erum  góð á skautum, rosalega góð.

Spilakvöld á E9

Á leið á áramótabrennu í Kalmansvík

Þessi er með myndavél á öllum myndum

Á brennu með ömmu Siggu

Flugeldar

Partý á Skagabraut, amma klikkar ekki á því um áramót :)

Göngutúr á nýársdag

Nice Capture...

Eftir kvöldmatinn skelltum við fjölskyldan okkur í bíltúr. Ferðinni var heitið á Flugeldasölu Björgunarsveitanna þar sem við styrktum þá aðeins. Svo tókum við smávegis rúnt um bæinn alla leið niður á Breið. Þar var ógurlega fallegt í kolniðamyrkri þar sem hundslappadrífan sveif þétt til jarðar. Vitinn lýsti upp snjódrífuna svoleiðis að við urðum agndofa.

"Ég vildi að ég væri með myndavélina", stundi ljósmyndarinn, horfði upp til vitans og hugsaði til 20 kílóa flykkisins sem sat heima á skrifborði. Hann nennir ekki alltaf að taka með sér þvi hún er svo fyrirferðarmikil.

"Ég er með mína", sagði bloggarinn og teygði sig eftir smáræðis sýnishorni af myndavél sem er ávallt geymt í veskinu.

Bloggarinn tók þessa fínu mynd, ekkert flass, á tíma (ljósopið haft opið lengur en blablabla). Hahaaa! Hún er kannski ekki alveg í fókus og ég þarf klárlega að fá mér þrífót, en ég get eftir sem áður tekið myndir á tíma! Ekki hafði ég hugmynd um það :) Jæja, farin að sprengja smávegis.

Nice capture =)

Jóladagur

Jæja, ég druslaðist út í hlaup á sjálfan Jóladag! Ekki veitir af, það brakaði í mér allri þegar ég fór á fætur í morgun, ég hef verið svo löt að hreyfa mig undanfarið. Við Ágústa hlupum saman 5k hring um bæinn og vorum svakalega ánægðar með dugnaðinn. Aldeilis fínt að skella sér svo í hangikjöt til tengdó og belgja sig út af góðum mat.

Annars er það helst að frétta að í gær var Aðfangadagur! Við fjölskyldan voru heima, eins og venjulega, og iðkuðum okkar helgu og fastmótuðu siði með smá tvisti hér og þar, allt eins og það á að vera. Börn og fullorðnir voru afskaplega ánægðir með gjafir og kveðjur. Við gáfum krökkunum litlar spjaldtölvur sem þau eru í skýjunum með og vinurinn dreif saumavélina upp á borð í morgun og saumaði poka utan um þær, vantar bara smellur til að loka þeim og þá eru komnar fínustu spjaldtölvutöskur. Hann er bæði úrræðagóður og handlaginn drengurinn :)

Jólatréð skreytt á Þorláksmessukvöld

Sólin að hengja skraut á jólatréð

Skrautið á jólatrénu á sér oft sögu, Björgvin gerði nokkra kanil-leirmuni á leikskólanum þegar hann var 4ra ára. Þeir ilma ennþá yndislega og minna alltaf á jólin :)

Fallegu systkinin á E9 á árlegri jólamyndatöku eftir skreytinguna. Ég held að jólatréð fari minnkandi með hverju árinu!

Krúttleg :)

Það voru nú ekki margar myndir teknar á aðfangadagskvöld, við gleymdum okkur alveg í hugginu. Þarna erum við farin að spila um miðnæturbil og Sólin komin í kósígallann :*

Vinurinn kominn í bolinn frá Keilufélaginu, helsáttur við kvöldið

Piparkökuhús 2012

Hér á heimilinu hafa verið í gangi framkvæmdir sem tafið hafa ýmsan jólaundirbúning. En nú sér fyrir endann á því öllu saman og nýtt og betrumbætt heimili óðum að verða tilbúið fyrir jólin. Í dag var loksins ráðist í gerð Piparkökuhússins 2012. Við máluðum líka piparkökur í dag, heilmikill kósídagur hér á E9.

Krakkarnir gerðu sín piparkökuhús á 1. í aðventu, þau voru étin samdægurs! Best að setja líka inn myndir af þeim:

Svo gerðum við kertastjaka úr appelsínu og fengum okkur heitt kakó og engiferkökur, fátt sem jafnast á við það!

Frídagur

Ég ákvað að vera grand og taka út langþráðan frídag á morgun. Vil samt ekki að þetta fari allt saman í vitleysu og mun nota fríið á skipulegan og gáfulegan hátt. Gerði lista til öryggis, samt ekki til skipulagsfrík í mér...

Published with Blogger-droid v2.0.9

Hlaupamynd

Það er kuldalegt um að litast þessa dagana, það er bara hressandi!

Published with Blogger-droid v2.0.9